Um okkur

Á Hauganesi við vestanverðan Eyjafjörð hefur Valdimar Kjartasson og fjölskylda hans stundað hestamennsku í fjölmörg ár. Upphafið má rekja til þess þegar Valdimar keypti sinn fyrsta hest árið 1969. Síðan þá hefur honum tekist að smita vel flesta fjölskyldumeðlimi af hestabakteríunni og er nú orðinn nokkuð stór hópur í fjölskyldunni sem gerir hestamennsku sína út frá Hauganesi.

Hestaeign fjölskydunnar telur rúm 30 hross sem að stærstum hluta koma úr heimaræktun. Nokkur hross, og þá sérstaklega þau eldri, koma frá Húsey í Skagafirði. Flest reiðhrossin sem nú eru til brúkunar eru undan Hreim frá Brún en hann gaf Matthías Eiðsson Valdimar frænda sínum í sextugsafmælisgjöf. Hreimur gaf fjölskyldunni geðgóð hæfileikahross þann tíma sem hann var graður en hann hefur nú verið geldur og er í eigu Sigtryggs Herbertssonar.

Fjölskyldan leigir u.þ.b. helming jarðarinnar Selá, sem er í eigu ríkisins, og nýtir hana til sláttu og beytar. Þar að auku leigir fjölskyldan land af Dalvíkurbyggð. Haustið 2007 var hesthúsið tekið í gegn og básar teknið og stíur settar í staðinn. Í húsinu eru nú fimm rúmgóðar einshestastíur, ein tveggjahesta og svo ein lítil einshestastía. Er þetta algjör bylting frá því sem var þegar nær eingöngu voru básar í húsinu. Eins og oftast áður var það Valdimar sjálfur sem bar hitan og þungan af framkvæmdunum en naut við þær aðstoðar Bjarna sonar síns og Kristins Inga Valssonar dóttursonar síns.

Skammt frá Hauganesi er Þorvaldsdalur, eyðidalur sem kjörinn er til útreiða yfir sumartímann. Þangað er mikið riðið yfir sumarið en annars er fjölbreyttni í reiðleiðum ekki mikil. Sárlega vantar reiðvegi um Árskógsströnd til að auðvelda þeim ferð sem vilja ferðast hér um ríðandi og framtíðardraumurinn er að tengja hestamenn í Dalvíkurbyggð með reiðvegum við hestamenn innar við fjörðinn. Þetta mundi auðvelda mönnum gríðarlega mikið ferðalög yfir sumarið og örugglega auka straum hópa í hestaferðum hér um svæðið.

 

Staðsetning

 

Hauganes er lítið þorp staðsett á Árskógsströnd við utanverðan Eyjafjörð að vestan, í 36 km fjarlægt frá Akureyri, höfuðstað Norðurlands.

Þetta svæði er á margan hátt ákjósanlegt fyrir hestamenn, stutt er í Svarfaðardal þar sem öll keppisaðstaða er eins og best verður á kosið og enn styttra í Þorvaldsdal sem er fallegur óbyggður dalur. Í honum er nokkrar jarðir sem allar fóru í eyði snemma á síðustu öld.

Á Hauganesi er starfrækt hvalaskoðun á sumrin og er þorpið vel þess virði að heimsækja það.